Një drejtoreshë gjimnazi në Pogradec është pezulluar nga detyra pasi dyshohet se falsifikonte diplomat e nxënësve. Ndaj saj është ekzekutuar edhe masa e detyrimit për t’u paraqitur në policinë gjyqësore. Valentinë Meçe, 48 vjeç, banuese në fshatin Buçimas të Pogradecit, me detyrë drejtoreshë e shkollës së mesme Çërravë, është nën hetim për falsifikim dokumentesh të nxënësve të kësaj shkolle, pas indicieve dhe provave të administruara që e implikojnë drejtoreshën në këtë vepër penale. Specialistët për Hetimin e Krimeve Ekonomiko-Financiare të Drejtorisë Vendore të Policisë së Korçës ekzekutuan këtë të diel, masën "Detyrimi për t'u paraqitur në policinë gjyqësore" dhe "Pezullimi i ushtrimit të një detyre a shërbimi publik", të caktuara nga Gjykata e Shkallës së Parë të Juridiksionit të Përgjithshëm së Korçës, për Valentina Meçen.