Këshilli i Lartë Gjyqësor ka pranuar pjesërisht kërkesën e Inspektorit të Lartë të Drejtësisë për procedim disiplinor ndaj gjyqtarit Taulant Tafa për shkelje disiplinore të kryera, pasi uli dënimin e Arben Grorit, I dënuar me burgim të përjetshëm. Ndonëse Inspektori I Lartë I Drejtësisë kishte kërkuar shkarkim nga detyra, Këshilli I Lartë Gjyqësor vendosi ta pezullojë gjyqtarin Tafa nga detyra për 3 muaj me të drejtën e përfitimit të pagës minimale. Në notën informuese, Inspektorit i Lartë i Drejtësisë ka argumentuar se në vendimin e dhënë për Grorin, gjyqtari Tafa ka parashtruar në mënyrë të dukshme fakte dhe rrethana të shtrembëruara. Duke numëruar faktet e konstatuara, ILD i tha Këshillit të Lartë Gjyqësor se gjatë zbritjes së dënimit prej 720 ditëve, Arben Grorit i është sjellë përfitim i padrejtë, pasi atij iu rrit fiktivisht koha e vuajtjes së dënimit.