Prokuroria e Tiranës ka regjistruar procedimin penal me dyshimet e evazionit fiskal për disa subjekte që ofrojnë shërbimet postare në kryeqytet. Prokuroria thotë se me autorizimin e gjykatës së Tiranës janë ushtruar kontrolle në disa subjekte. Deri më tani nga kontrollet janë sekuestruar sasi të konsiderueshme mallrash të marra në dorëzim pa fatura tatimore, 13 milionë lekë, si dhe dokumentacion shoqërues. Materialet e sekuestruara, sipas Prokurorisë së Tiranës, janë vlerësuar si prova që tregojnë paligjshmëri në drejtim të evazionit fiskal, si dhe shuma parash që dyshohen se rrjedhin nga aktiviteti i paligjshëm. Nën hetim janë disa subjekte, teksa prokuroria thotë se po punon për identifikimin e shitësve realë të mallrave të sekuestruar.