Ministria e Mbrojtjes ka urdhëruar evakuimin e detyrueshëm për mijëra banorë në Durrës, Vlorë dhe Fier, që sipas vlerësimit të emergjencave civile janë nën rrezik për jetën si pasojë e përmbytjeve. Urdhër evakuimi është nxjerrë për zonat e Sukthit dhe Katundit të Ri në Bashkinë e Durrësit, pas daljes nga shtratit të lumit Erzen, që pasi ka përmbytur mijëra hektarë tokë dhe bllokuar disa rrugë, tashmë kërcënon edhe qytetin e Sukthit, ku niveli i ujit është rritur me shpejtësi. Situata më kritike paraqitet në njësinë administrative Katund i Ri, konkretisht në fshatin Erzen, ku çarja e argjinaturës ka detyruar autoritetet të ndërhyjnë për evakuimin e banorëve. Përmbytje janë evidentuar edhe në fshatrat Katund i Ri, Katund Sukth dhe Fllakë.