Të paktën 10 sulme terroriste nga grupet militante të Xhihadit u parandaluan në Europë për vitin 2023, sipas agjencisë holandeze të inteligjencës, AIVD, e cila ngriti alarmin se pas luftës së nisur mes Izraelit dhe grupit militant të Hamas janë rritur kërcënimet akoma më shumë për vendet e bashkimit europian dhe Shtetet e Bashkuara të Amerikës. Në raportin vjetor të publikuar, AIVD pa dhënë detaje, thekson se sulmet e ndërmarra nga xhihadistët kanë qenë kryesisht në qendra tregtare apo zona të tjera të mbipopullura. “Kanë qenë dy çështje mobilizuese: shkatërrimi i Kuranit në Holandë dhe shtetet tjera evropiane, si dhe konflikti në mes të Izraelit dhe Hamasit”, ka thënë agjencia holandeze. Suedia e ka rritur alarmin për rrezik nga terrorizmi pas ngjarjeve të ndodhura në këtë shtet, ku dy herë u dogj Kurani, libri I shenjtë I besimtarëve myslimanë. Po ashtu në Bruksel dy tifozë futbolli suedezë u qëlluan për vdekje nga një person, I cili e identifikoi veten si pjesë e grupit ekstremist të shtetit islamik.