Presidenti i Serbisë, Aleksandër Vuçiç tha të dielën se një takim mes anëtarëve të Parlamentit Evropian dhe kundërshtarëve të tij politikë në vend gjatë një vizite në Beograd ishte "më qesharaku në botë". Vuçiç tha për TV Prva se i vjen “shumë keq që njerëzit tanë u kushtuan kaq shumë vëmendje atyre që erdhën”. Ai i quajti eurodeputetët njerëz “krejtësisht të parëndësishëm”. “Ata nuk dëgjojnë çfarë u thotë opozita. Opozita u tregon atyre të gjitha gjërat më të këqija për Serbinë”, tha Vuçiç. Ai gjithashtu e quajti të “pacipë” kërkesën e opozitës drejtuar delegacionit të Parlamentit Evropian për vendosur sanksione ndaj anëtarëve të partisë në pushtet në Serbi. Një delegacion nga Parlamenti Evropian vizitoi Beogradin nga 22 deri më 24 janar. Delegacioni, i udhëhequr nga eurodeputetja portugeze Marta Temido, nuk u prit nga Vuçiç dhe as nga kryetarja e Kuvendit, Ana Bërnabiç që ndodheshin jashtë vendit. Më herët, si Vuçiç ashtu edhe Bërnabiç kishin thënë se nuk donin të takoheshin me eurodeputetët, duke pretenduar se as nuk ishin njoftuar dhe as nuk ishin pyetur për mbërritjen e tyre, gjë që Parlamenti Evropian e mohoi.