Për të parën herë në 20 vite, shkalla e këmbimit mes euros dhe dollarit amerikan, është thuajse e njëjtë, me dy monedhat që janë më pak se një cent larg barazisë. Euro u këmbye të hënën pasdite me 1.004 dollarë amerikanë, me një rënie preej rreth 12 për qindësh që nga fillimi i vitit. Frika e recesionit në kontinent, ushqyer nga inflacioni i lartë dhe pasiguria e furnizimeve me energji, të shkaktuara nga pushtimi rus i Ukrainës, konsiderohet si shkak për këtë... Bashkimi Evropian, që merrte thuajse 40 për qind të furnizimeve me gaz nga rusia po përpiqet të reduktojë varësinë nga nafta dhe gazi rus. Dhe moska ka reduktuar furnizimet për vendet anëtare. Kriza e energjisë vjen ndërkohë bashkë me një ngadalësim ekonomik që ka ndezur dyshime nëse banka qendrore evropiane do të mund të forcojë politikat në mënyrën e duhur për të ulur inflacionin. Banka njoftoi se do të rrisë normën e interesit këtë muaj, për të parën herë që nga viti 2011 ndërsa shkalla e inflacionit në eurozonë është 8.6 për qind. Por, disa ekspertë mendojnë se Banka qendrore evropiane është e vonuar dhe se një rënie e fortë është e paevitueshme. Një seri masash të marra nga rezerva federale amerikane, në anën tjetër, do ta mbajnë nën presion euron ndërkohë që investitorët orientohen drejt dollarit amerikan, si një parajsë e sigurt. Madje disa ekspertë parashikojnë edhe një situatë në të cilën euro mund të zbresë edhe nën dollarin amerikan, në një kurs këmbimi 0.95 ose 0.97 dollarë. Ndërkohë që kjo rënie e euros përballë dollarit amerikan, është një lajm i mirë për amerikanët që planifikojnë të vizitojnë evropën këtë verë pavarësisht se përbën një lajm të keq për stabilitetin global ekonomik.