Presidentja e Kosovës, Vjosa Osmani, ia zgjati mandatin misionit evropian për sundimin e ligjit - EULEX edhe për një vit. Në një njoftim për shtyp të lëshuar nga Zyra e Presidentes thuhet se Osmani e njoftoi shefin e politikës së jashtme të Bashkimit Evropian, Josep Borrell, në lidhje me vendimin. Në letrën drejtuar atij, Osmani tha se EULEX-i “do të jetë me mandat teknik, pa fuqi ekzekutive dhe i bazuar vetëm në monitorim, mentorim dhe këshillëdhënie”. “I njëjti mandat mund të shtyhet edhe për një vit tjetër, në rast të vlerësimit pozitiv të punës së këtij misioni nga presidentja e Republikës së Kosovës”, thuhet në letër. Mandati i tij do të skadonte këtë muaj. EULEX u vendos në Kosovë në vitin 2008, pasi Kosova shpalli pavarësinë. Ai ka përbërë misionin më të madh civil në kuadër të politikës së përbashkët të Bashkimit Evropian për siguri dhe mbrojtje. Në fazën e hershme, qëllimi i tij ishte t’i ndihmonte autoritetet e Kosovës në ngritjen e institucioneve të qëndrueshme dhe të pavarura të sundimit të ligjit. Shumica e kompetencave të drejtësisë që ka pasur administrata e OKB-së në Kosovë - UNMIK, i kanë kaluar EULEX-it. Por, nga viti 2018, edhe kompetencat dhe përgjegjësitë e EULEX-it janë reduktuar në masë të madhe, duke i kaluar sistemit vendor. Pjesëtarët e EULEX-it gëzojnë imunitet ndaj proceseve ligjore dhe administrative të Kosovës. Për zgjatjern e mandatit të këtij misioni kërkohet marrëveshje ndërmjet Kosovës dhe BE-së.