Ethet e mandatit të katërt qeverisës po shtohen mes të majtëve teksa afron dita kur kryesocialisti, Edi Rama do të ngjitet në podium për të njoftuar emrat që do jenë pjesë e këshillit të ministrave, ndryshimet në strukturat e Partisë Socialiste dhe në çështjet parlamentare. Në orën 9:30, në periferi të Tiranës, ashtu siç e do tradita, do të mbajë fjalën shefi i ekzekutivit, Edi Rama, i cili ruan ekzkluzivitetin e përzgjedhjeve që do të bëjë për postet ministrore. Fundi i mandatit të tretë tregoi se identikiti që Rama kërkon për drejtimin e dikastereve ministrore, kryesisht lidhet me figura tekniciene, të papërfolura në publik dhe që nuk kanë hesape me institucionet e drejtësisë. Agjenda e asamblesë, fillon me miratimin e rendit të ditës, fjalën e kyretarit Edi Rama, e më pas një minutazh i dedikuar për mendime, pyetje dhe diskutime. Në korridoret e Partisë Socialiste qarkullojnë disa emra të cilat mund të ngjiten drejt kabinetit qeveritar. Që në momentin kur socialisti Ervin Demo dha dorëheqjen nga posti i kryetarit të bashkisë së Berat, për të kandiduar për deputet, mes të majtëve nuk munguan zërat që e projektonin në atë në një ministri me profil ekonomik e financiar. Ndërkohë gjatë ditëve të fundit, nuk janë përjashtuar mundësitë për të pasur disa rikthime gjatë këtij mandati, duke filluar nga Taulant Balla, në postin e kryetarit të grupit parlamentar dhe Damian Gjiknuri në kabinet qeveritar, por kësaj here tek bujqësia, një sektor me prioritet për grupkapitullin e pestë të negociatave, për të cilin Shqipëria po përgatit pozicionin negociues e që pritet të ketë një komision të dedikuar në kryesinë e kuvendit.