Pas publikimit të një raporti të Institutit për Matjen dhe vlerësimin e shëndetit në SHBA, mbi parashikimin e ecurisë së pandemisë në Shqipëri për periudhën e vjeshtës, reagojnë dhe epidemiologët tanë të shëndetit publik. Epidemiologu Alban Ylli në një prononcim për gazetën shqip thotë se është shifër ekstreme ajo e studimit amerikan në të cilin thuhet se deri në muajin tetor numri i viktimave nga covid 19 në vendin tonë mund të kalojë mbi 1300. “Kemi parë shumë projeksione ekstreme matematike këtë periudhë. Ajo çfarë dimë është se mund të vijojë të rritet me ritme më të ulëta. Dhe në vjeshtë-dimër nuk e di askush cfarë ritme do ketë një valë tjetër”, thotë Alban Ylli. Më herët dhe mjeku infeksionist Pëllumb Pipero është shprehur skeptik për situatën epidemiologjike në vjeshtë. Projeksionet e ekspertëve të shëndetit publik janë të tilla që e paraqesin kurbën gjithnjë e në rritje pa ndonjë ulje ngritje të theksuar. Sipas tyre, deri në muajin nëntor pritet që të kemi të tillë situatë me shifra ditore mbi 120 raste dhe me shpresën se numri i viktimave do jetë më i ulët. Ekspertët tanë të shëndetit publik thonë se në të tilla kushte shkollat nuk duhet të hapen, pasi virusi covid 19 po qarkullon lirisht brenda vendit, pra qarkullim komunitar dhe fëmijët janë burim transmetimi të virusit brenda familjes.