Shtrenjtimi i energjisë elektrike në Kosovë, ka bërë që rreth 400 fabrika të konsiderojnë mundësinë e mbylljes së aktivitetit. Bizneset do të protestojnë më 11 qershor në sheshin e Prishtinës. Kryetari i Odës Ekonomike të Kosovës, Lulzim Rafuna thotë se bizneset kërkojnë nga qeveria reflektim. “Të gjithë kërkuan dhe u pajtuan që t’i bëjmë thirrje prapë qeverisë që të reflektojë, ZRRE-së që të reflektojë. Të na jepet mundësia e një faze të tranzicionit sic e kemi kërkuar më herët. Të përgatitet tregu, të përgatitet një paketë qe e përcjellë gjatë kësaj faze të tranzicionit lehtësimin për të dalë në treg të lirë dhe biznesi të kalojë në tregun e lirë në datën që do të dakordohemi të gjithë bashkë. Në rast se nuk do të ketë një reflektim, atëherë bizneset, bashkë me punëtorët, ditën e mërkurë do të dalim në shesh prej orës 11:00 deri në 12:00 për të shprehur pakënaqësitë që kemi lidhur me këtë vendim. Dhe për mos reflektimin e Qeverisë së Kosovës.”