Këshilli i Emërimeve në Drejtësi ka kualifikuar Sonila Bejtjen për të kandiduar për vendin vakant në Gjykatën Kushtetuese, ndërsa është skualifikuar Eugen Papandile. Kjo e fundit do të kandidojë për vendin vakant të shpallur nga Presidenti që më 22 nëntor të 2019, pasi gjyqtari i asokohe, Besnik Muçi, shkarkua nga Vettingu. Në mbledhjen e kësaj të premteje merrnin pjesë anëtarët e Këshillit të Emërimeve në Drejtësi, anëtarët zëvendësues, përfaqësuesi i Avokatit te Popullit, përfaqësuesit e Presidentit të Republikës, përfaqësuesi i Kryetarit të Kuvendit. Shqyrtimi i rasteve të kandidatëve për vendet vakante për gjyqtar në Gjykatën Kushtetuese është vendosur në përfundim të procedurave të verifikimit rigoroz dhe të thelluar të ndjekura nga Këshilli, sipas ligjit dhe standardeve tashmë të njohura e të aplikuara që kërkohen për përzgjedhjen, qenien dhe konfirmimin në detyrën e magjistratit apo anëtarit të Gjykatës Kushtetuese. Këshilli i Emërimeve në Drejtësi, pasi shqyrtoi aktet dhe procedurën e ndjekur për verifikimin e kandidaturave dhe dokumentacionin e përgatitur lidhur me plotësimin e kushteve ligjore për kandidim, për secilin kandidat të përcaktuar në rendin e ditës, pasi dëgjoi mendimin e Avokatit të Popullit lidhur me procedurën e ndjekur në verifikimin e kandidaturave, unanimisht vendosi lejimin e kandidimit të Sonila Bejtjas.