Kryeministri i Spanjës Pedro Sanchez sulmoi të mërkurën miliarderin Elon Musk duke e akuzuar atë për ndërhyrje në politikën evropiane dhe për minimin e demokracisë. “E djathta ekstreme ndërkombëtare që ne e kundërshtojmë në Spanjë prej vitesh, e mbështetur në këtë rast nga njeriu më i pasur në planet, po sulmon hapur institucionet tona, po nxit urrejtje dhe mbështet hapur trashëgimtarët e nazizmit në Gjermani”, tha Sanchez për Musk pa e përmendur në mënyrë të drejtpërdrejtë emrin e tij. Sanchez foli në Madrid, në një ceremoni të zhvilluar në 50 vjetorin e vdekjes së diktatorit Francisco Franco. Musk, i cili do të shërbejë nën presidentin e sapozgjedhur të SHBA-së, Donald Trump, si këshilltar i jashtëm i ngarkuar me modernizimin e qeverisë, u përfshi edhe në politikën spanjolle të dielën duke komentuar në X një artikull që thoshte se dënimet për përdhunim në rajonin verilindor të Spanjës, Katalonjë, ishin dhënë kryesisht për të huajt.