Një person është ekzekutuar me armë zjarri këtë të diel teksa ishte duke pirë kafe me të atin në një lokal në Kavajë. Ngjarja ka ndodhur rreth orës 18:30 minuta në zonën pranë shkollës 9-vjeçare ‘Rilindja’, ndërsa viktima është identifikuar si shtetasi Arjan Gosa. Autori i krimit ka hyrë i qetë në ambientet e lokalit dhe ka goditur nga afër me tek plumb në kokë viktimën, duke e lënë të vdekur në vend. Më pas, ai është larguar po me qetësi në këmbë nga vendi i ngjarjes. Arjan Gosa është vëllai i Edmond Gosës, njohur edhe me emrin Armand Gosa. Armand Gosa ishte një nga viktimat e sherrit të dyfishtë të ndodhur më 28 mars në Kavajë, bashkë me Altin Rexhën. Në atë ngjarje, Gosa goditi me thikë Altin Rexhën në prani të djalit të mitur të këtij të fundit, ndërsa Rexha e qëlloi me armë zjarri. Si pasojë e plagëve, që të dy ndërruan jetë. Dyshohet se vrasja e Arjan Gosës është kryer për hakmarrje. Policia është duke këqyrur kamerat e sigurisë së lokalit për të identifikuar autorin, ndërsa grupe të shumta kanë ngritur postoblloqe dhe po zhvillojnë aksione për kapjen e tij në Kavajë dhe Durrës.