Prokuroria e Korçës ka përfunduar hetimet për vrasjen e 42-vjeçarit, Egli Proga dhe ka akuzuar autorin e saj, Denis Meçe për vrasje me dashje. Ndërkohë, ndaj 3 personave të tjerë, Voltan Shulku, Arian Manellari dhe Leonidha Guçe është ngritur akuza për “moskallëzim krimi” dhe “veprime që pengojnë zbardhjen e së vërtetës”. Denis Meçe dyshohet se dhunoi për vdekje 42-vjeçarin Egli Proga, ngjarje e ndodhur 10 Gusht në lagjen nr.1 të qytetit të Pogradecit. Voltan Shulku, Arian Manellari dhe Leonidha Guçe dyshohet se kanë qenë të pranishëm kur ka ndodhur ngjarje, por nuk kanë kallëzuar krimin. Vrasja e 42-vjeçarit shkaktoi protesta dhe akuza ndaj policisë për përpjekje për të fshehur ngjarjen, ndërsa prokuroria fillimisht ngriti akuzën e vrasjes nga pakujdesia, por pas reagimit publik akuza u ndryshua në vrasje me dashje.