Prokuroria e Elbasanit ka çuar për gjykim Sokol Mjacajn dhe 12 zyrtarë të burgut të Peqinit për vrasjen e kryer në 15 Dhjetor 2023 brenda këtij institucioni, ku mbeti viktimë i dënuari, Arben Lleshi, ndërsa Indrit Shaqja u plagos. Në kohën kur ndodhi ngjarja u arrestuan autori i dyshuar i krimit Sokol Mjacaj, drejtori i burgut të Peqinit, Kamber Hoxha, Qani Muça, shefi i regjimit të godinës “41 biss”, si dhe 10 punonjës të burgut. Hetimet kanë zbuluar se Sokol Mjacaj, i dënuar me burgim të përjetshëm për vrasjen e dy turistëve çekë, është i dyshuari kryesor për vrasjen e Lleshit dhe plagosjen e të dënuarit tjetër. Mjacaj dyshohet se ka përdorur një armë që ishte futur në burg disa javë para ngjarjes. Ai ka pranuar se kishte pasur një konflikt me Lleshin, por sipas prokurorisë ky është një një justifikim, ndësa e konsideron vrasjen si një krim të kryer për pagesë.