Ka përfunduar kalvari i seancave gjyqësore në Itali, sa i takon vrasjes së dy kushërinjve shqiptar, Alban dhe Agron Lleshaj në vitin 2016. Gjykata e Lartë dha vendimin për 2 autorët e ngjarjes, Edmond Lleshaj dhe Eduard Nikolli, përkatësisht 20 dhe 18 vite burg secili. Edmond Lleshaj dyshohet të jetë kreu i grupit kriminal që kreu vrasjen e dy kushërinjve shqiptar, ndërkohë në ekzekutim morën pjesë të paktën 5 persona. Tre të tjerët janë dënuar më herët. Ata janë dy vëllezërit Pjetër dhe Elidon Lleshaj, të cilët u dënuan me nga 20 vite burg, si edhe Fation Stojani me 16 vite burg. Tre nga autorët pranuan krimin dhe morën dënimin e tyre, ndërsa dy të tjerët Edmond Lleshaj dhe Eduart Nikolli vendosën të ndiqnin më tej proceset gjyqësore deri kur u mor vendimi përfundimtar për ta. Ekzekutimi i Lleshajve, sipas dosjes gjyqësore erdhi pas përplasjes mes dy fraksioneve shqiptare që merreshin me trafikun e drogës, për ndarje territoresh. Një klient i viktimave i kishte tradhtuar duke iu drejtuar konkurrentëve për blerje, ndaj nisi sherri mes palëve. Grupi i Edmondit hapi zjarr ndaj makinës së viktimave, duke bërë që pasagjeri të gjente vdekjen e menjëhershme, kurse drejtuesi i mjetit ka arritur të përshkojë rreth 500 metra dhe më pas është përplasur me një automjet tjetër të parkuar në via Ancona dhe ka humbur jeten. Një ng autorët e kësaj ngjarje, Fation Stojani u kap më 27 mars 2018 në qytetin e Burrelit.