Procesi gjyqësor që dënoi me burgim të përjetshëm Arben Frrokun, autorin e vrasjes së kryekomisarit Dritan Lamaj ka pasur shkelje të Konventës Europiane për të Drejtat e Njeriut. Ky është vendimi i Gjykatës së Strasburgut, që ka kërkuar që çështja të rigjykohet nga Gjykata Kushtetuese e Shqipërisë. Frroku iu drejtua Gjykatës së Strasburgut, pasi ankimi i tij iu rrëzua edhe në Gjykatën e Lartë në qershor 2017, si edhe në Gjykatën Kushtetuese më 24 prill 2018, duke lënë në fuqi dënimin me burg përjetë. Pas vendimit të Gjykatës Europiane për të Drejtat e Njeriut, mbrojtjes së të dënuarit i lind e drejta për t’iu drejtuar Kushtetueses me kërkesën për rigjykim të çështjes. Vendimi i Strasburgut, nuk përcakton fajësinë apo pafajësinë e Arben Frrokut për vrasjen e kryekomisarit, por detyron gjyqësorin shqiptar, të rigjykojnë çështjen për shkak të pretendimeve të mbrojtjes për shkelje proceduriale.