Me urdhër të Prokurorisë së Posaçme, Policia e Tiranës ka arrestuar tre persona në lidhje me vrasjen e gjyqtarit Astrit Kalaja, ngjarje e rëndë që ndodhi brenda sallës së gjyqit në Gjykatën e Apelit. Pas arrestimit të autorit të dyshuar të vrasjes, Elvis Shkambi, në pranga kanë rënë edhe xhaxhai i tij, Gjon Shkambi, si dhe një punonjës sigurie i Gjykatës së Apelit Tiranë. Roja i sigurisë dyshohet se ka neglizhuar në detyrë, duke lejuar hyrjen e armatosur të autorit në ambientet e gjykatës, ku ndodhi krimi. Hetimet janë përqëndruar edhe në zbardhjen e zinxhirit të përgjegjësisë për këtë rast dhe rindërtimin e plotë të skenës së vrasjes së gjyqtarit Kalaja. Kalaja u qëllua tre herë nga autori Elvis Shkambi fill pasi lexoi vendimin për të mos dëbuar 31 familjet nga godina e ish rezervave të shtetit në Shkodër, ku xhaxhai i autorit, Gjon Shkambi pretendonte pronësinë.