Një javë pas emërimit të tij në krye të drejtorisë së përgjitshme të policisë së shtetit, Muhamet Rrumbullaku ka kërkuar të dhëna nga drejtoritë e qarqeve lidhur me vrasjet e pazbardhura në vend. Dy javë nga hyrja në muajin e nëntë të këtij viti, në vendin tonë janë shënuar rreth 38 vrasje, ku viktimë e tyre kanë mbetur 44 persona. Nga kjo shifër, 10 prej tyre kanë ndodhur për shkak të krimit brenda familjes, për arsye nga më të ndryshmet, disa prej ngjarjeve janë zbardhur dhe autorët e tyre janë idetifikuar, ndërsa për 13 ngjarje kriminale në vend ende nuk ka autorë të dyshuar, të shpallur në kërkim apo të arrestuar. Nga të gjitha qarqet vendore, Shkodra zë vendin e parë për numrin më të madh të krimeve të regjistruara 9 muajt e fundit. Por, nuk mbetet pas Tirana, Vlora apo Fieri për vrasje të natyryes mafioze, ku ende sot nuk ka asnjë autor të arrestuar. Disa nga ngjarjet, dinamikat e t cilave nuk janë zbardhur në harkun kohorë të 9 muajve të fundit, janë vrasja e Erion Çelës në 4 janar, Iljaz Calit në muajin prill Aleksandër Sadikaj në 11 qershor. Të pazbarhdura janë edhe ekzekutimet që tronditën Shkodrën, konkretisht ekzekutimi i Nazmi Bandulës, Naim Bajrit dhe Lulash Qepurit. Asnjë nuk përfundoi në pranga as për vrasjen e Arben Mërkurit e Petraq Gjikës apo për masakrën e Fushë Krujës në muajin korrik, ku mbetën të vrarë Diklen Vata, Brilant Martinaj dhe Besmir Hoxha.