Qeveria e Ekuadorit ekstradoi të dielën trafikantin më të madh të drogës, Adolfo Macias, të njohur me nofkën “Fito” në Shtetet e Bashkuara, një muaji pasi ai ra në duart e autoriteteve. Më 2024, ai ishte arratisur nga një burg i sigurisë së lartë. Zyra e Prokurorit në Shtetet e Bashkuara e ka publikuar aktakuzën kundër tij në prill. I përshkruar si kreu i bandës “Los Choneros", Macias akuzohet për shpërndarje të kokainës, për komplot dhe dhunë me armë, përfshirë kontrabandë të armëve. Në një letër të publikuar nga Departamenti amerikan i Drejtësisë është thënë se Macias do të paraqitet në gjykatën federale gjatë ditës. Ky shtetas ekuadorian, dikur një shofer taksie, por i shndërruar në bos krimi, ka pranuar në gjykatë një javë më parë që të ekstradohet në Shtetet e Bashkuara për t’u përballur atje me akuzat. Ai është shtetasi i parë nga Ekuadori që ekstradohet nga vendi i tij që prej hyrjes në fuqi të ligjit të ri një vit më parë. Ligji është miratuar pas një referendumi të mbajtur nga presidenti Daniel Noboa me qëllim të sigurimit të mbështetjes për të luftuar bandat kriminale.