Ekstradohet nga Gjermania në Shqipëri një 37-vjeçare rumune e shpallur në kërkim për mashtrim. Sipas njoftimit zyrtar të Interpol Tiranës, shtetasja rumune kishte mashtruar përmes emaileve fiktive përfaqësuesit e një biznesi shqiptar duke përfituar rreth 33 500 euro. 37-vjeçarja e kërkuar ndërkomtarisht, ishte dënuar me 5 vite burgim në vitin 2022 nga Gjykata e Rrethit Gjyqësor Tiranë, për veprën penale “Mashtrimi kompjuterik”. Gjatë periudhës mars-prill, 2019, ajo përfitoi rreth 33 500 euro, pasi mashtroi përfaqësuesit e një shoqërie tregtare shqiptare në fushën e shitblerjes së pjesëve të automjeteve, duke iu dërguar emaile nga llogari me kredenciale shumë të ngjashme me kredencialet e llogarive të bashkëpunëtorëve të shoqërisë, jashtë shtetit. Zbardhja e kësaj skeme të mashtrimit kompjuterik u realizua falë bashkëpunimit ndërmjet Policisë shqiptare dhe autoriteteve të Mbretërisë se Bashkuar.