Gjovalin Lesi, i dënuar me burgim të përjetshëm për vrasje të dyfishtë është ekstraduar nga Italia. Ky shtetas është dënuar përjetë nga Gjykata e Mirditës në vitin 1998 për veprat penale vrasja me paramendim dhe mbajtja pa leje dhe prodhimi i armëve, armëve shpërthyese dhe municionit. Në vitin 1997, Gjovalin Lesi 56 vjeç ka vrarë me armë zjarri kallashnikov, motrën dhe bashkëshortin e saj, pas një konflikti për motive të dobëta, në fshatin Rrasfik në Rubik. Ai u arrestua në Itali në muajin prill të një viti më parë si rezultat i informacionit të siguruar nga Departamenti i Policisë Kriminale në Policinë e Shtetit dhe të shkëmbyer nga Interpol Tirana me Interpol Romën. Policia njofton se vijon bashkëpunimi me partnerët për lokalizimin, kapjen dhe ekstradimin e shtetasve të shpallur në kërkim ndërkombëtar si dhe të atyre që janë të dënuar.