Egnatia nuk zbret nga froni i kampionit të shqipërisë. Skuadra rrogozhinase fitoi trofeun më të rëndësishëm në futbollin shqiptar, atë të kategorisë Superiore teksa në ndeshjen finale shkatërroi Vllazninë duke e mundur me rezultatin e thellë 4-0, një sfidë kjo që u gjykua nga arbitri polak Marciniak. Ishte një ndeshje e dominuar totalisht nga Egnatia e cila e zhbllokoi rezultatin që në minutat e para me Regi Lushkjan.Vllaznia iu afrua golit të barazimit teksa menjëherë godit shtyllën por pjesa e parë u mbyll 1-0 për rrogozhinasit. Në fillimin e pjesës së dytë, Egnatia shënoi edhe golin e dytë sërish me Regi Lushkjan. Për Vllazninë u bë e pamundur të reagojë, ndërkohë që Egnatia vijoi me dominimin e saj në lojë teksa shënoi edhe golin e tretë me Leo Melon, ndërkohë që në minutat shtesë Ujka plotësoi pokerin e golave për Egnatian që e fitoi këtë ndeshje 4-0 duke fituar edhe titullin kampion për të dytin vit radhazi, ndërkohë Vllaznia që ëndërronte prej 24 vitesh duhet të presë ende për t’u kthyer te titulli kampion i vendit.