Presidenti i Serbisë, Aleksandar Vuçiq, tha të dielën se autoritetet serbe po zhvillojnë një hetim për shpërthimin në kanalin Ibër-Lepenc në veri të Kosovës, duke hedhur poshtë përsëri akuzat e autoriteteve kosovare se Beogradi ka gisht në sulmin ndaj infrastrukturës jetike kosovare. Shpërthimi mbrëmjen e së premtes i shkaktoi dëme të konsiderueshme në kanalin e ujit të Ibër-Lepencit në fshatin Varragë të komunës së Zubin Potokut, duke rritur frikën se shumë pjesë të vendit do të mbeteshin pa ujë dhe pa energji elektrike. "Përveç se nuk kemi asnjë lidhje me këtë, ne kemi qenë aq të drejtë dhe, si një shtet serioz, nuk jemi marrë me akuza dhe nuk kemi thënë se ai sulm është urdhëruar drejtpërdrejt nga Kurti”, tha Vuçiç duke iu referuar kryeministrit të Kosovës, i cili akuzoi Serbinë për “dirigjimin” e këtij sulmi “terrorist dhe kriminal”. Ai tha se hetimet do ta zbardhin të vërtetën, sepse “edhe ne po zhvillojmë hetimin tonë”. “Kemi disa dyshime të caktuara, por hetimi do të tregojë se kush e ka urdhëruar sulmin. Mendoj se kemi disa të dhëna që na tregojnë se kush mund të jetë autori”, tha Vuçiç.