Parlamenti i Sllovenisë miratoi të martën një dekret për njohjen e një shteti palestinez, duke cuar përpara një votim, në kundërshtim me një mocion të opozitës për të mos e mbajtur atë. Pesëdhjetë e dy deputetë të parlamentit prej 90 anëtarësh votuan në favor të dekretit të sponsorizuar nga qeveria për njohjen e një shteti palestinez. Votimi pasoi një lëvizje të ngjashme nga tre vende të tjera evropiane javën e kaluar në përgjigje të luftës shkatërruese të Gazës. Qeveria e qendrës së majtë të Sllovenisë dërgoi dekretin për njohjen e një shteti Palestinez për miratim në parlament, të enjten e kaluar, si pjesë e përpjekjeve për t'i dhënë fund luftimeve në Gaza sa më shpejt të jetë e mundur. Opozita konservatore Partia Demokratike Sllovene e udhëhequr nga ish-kryeministri Janez Jansa, paraqiti të hënën një propozim për të kryer një referendum këshillues mbi njohjen. Ai tha se Sllovenia duhet të mbetet në krahun e shumicës së shteteve të BE-së që kanë vendosur se tani nuk është koha e duhur për një lëvizje të tillë. Sidoqoftë, parlamenti bëri përpara me votimin dhe dekreti u miratua. Spanja, Irlanda dhe Norvegjia njohën një shtet palestinez javën e kaluar, duke e çuar në 145 numrin e vendeve që njohin shtetin palestinez, nga gjithsej 193 anëtarët e Kombeve të Bashkuara.