Sekretari i Përgjithshëm i NATO-s, Mark Rutte beson se do të arrihet marrëveshje ndër vendet anëtare për rritjen e kuotës së shpenzimeve për mbrojtjen në pesë përqind të produktit bruto. "Unë mendoj, që në Hagë do të biem dakord për kuotën e gjithsej pesë përqindëve", deklaroi Sekretari i Përgjithshëm i NATO-s Mark Rutte në takimin e pranverës të Asamblesë Parlamentare të NATO-s në Dejton, në shtetin federal të Ohajos në SHBA. Në fillim të muajit Rutte propozoi 3,5 përqind të produktit bruto për mbrojtjen dhe 1,5 përqind për infrastrukturën. Aleanca ushtarake e NATO-s, pritet që të bjerë dakord për objektivat e reja më 24 dhe 25 qershor në samitin që do të mbahet në Hagë. Gjermania përpara dy javësh i mbështeti kërkesat e presidentit aamerikan, Donald Trump, sipas të cilit aleatët duhet të rrisin në pesë përqind të produktit bruto shpenzimet e tyre për mbrojtjen. Sipas ministrit gjerman të Mbrojtjes, Boris Pistorius, kuota e shpenzimeve për mbrojtjen në produktin bruto të Gjermanisë do të rritet brenda një periudhe pesë vjeçare me 0,2 përqind në vit. Nga 2,1 përqind vitin e kaluar deri më 2032 do të arrihet një kuotë prej 3,5 përqindësh.