Ndryshimi i formulës së shpërndarjes së mandateve nga vota parapëlqyese e qytetarëve mund të dhjetëfishojë numrin e deputetëve që do të jenë në Kuvend si ndër më të preferuarit e votuesve. Në lojë janë deri në 30 mandate që sipas përllogaritjeve të bëra duke u bazuar te shpërndarja e votës në vitin 2021, do të shkojnë për kandidatët e caktuara në listën e hapur të partive politike që garojnë më 11 maj. Shifra është dhjetë herë më e lartë se numri i deputetëve që thyen herësin prej 10 mijë votash në zgjedhjet e vitit 2021, ku ishin vetëm tre emra.