Gjykata e Lartë ka rrëzuar rekursin e bërë nga ish kryetari i bashkisë Lushnje, Fatos Tushe dhe vartësit e tij. Këta të fundit bënë rekurs në gjykatën e lartë duke kërkuar lirinë, por kjo kërkesë u rrëzua, duke mos e kaluar cështjen për shqyrtim. Gjykata vendosi mospranimin e rekurseve të paraqitura nga personat nën hetim Fatos Tushe, Flamur Peqini, Gazmend Çela, Bektash Nexha, Bujar Murati kundër vendimit të Gjykatës së Posaçme të Apelit për Korrupsionin dhe Krimin e Organizuar. Fatos Tushe u arrestua në muajin korrik, nën akuzën e shpërdorimit të detyrës, për abuzim me tenderin me vlerë 24 milionë lekë për rehabilitimin e një kanali vaditës në fshatrat Bishqethëm dhe Bitaj. Nga hetimet e thelluara të prokurorisë së posacme, rezultoi se Tushe ka shpërdoruar detyrën në 3 raste, gjatë qëndrimit të tij në krye të bashkisë Lushnje. Kërkesa e ish kryebashkiakut të Lushnjes është rrëzuar disa herë nga gjykata, edhe pse ky I fundit kërkoi liri me justifikimin se kishte probleme shëndetësore dhe se duhet të qëndronte në shtëpi.