Një 26-vjeçar është arrestuar në flagrancë nga Policia e Maliqit, pasi dyshohet se ka ndezur zjarr me qëllim hapjen e kullotave në zonën e quajtur "Arat e Sulës", mbi fshatin Leminot. Ngjarja ka ndodhur më një ditë më parë, rreth orës 15:00, dhe për shkak të përhapjes së flakëve nga era, është djegur një sipërfaqe toke me bimësi dhe shkurre. Policia bëri të ditur se materialet procedurale janë referuar Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme ligjore. Drejtoria Vendore e Policisë Korçë u bën thirrje qytetarëve të shmangin zjarrvënien e qëllimshme, pasi çdo rast do të ndiqet penalisht.