Një 35-vjeçar, I identifikuar si Dod Gjoka është marrë peng rreth orës 14:30 këtë të enjte. Sipas policisë, pengmarrja ka ndodhur në vendparkimin e automjeteve të një lokali në aksin rrugor “Lezhë-Milot”. Dyshohet se 35-vjeçari Gjoka, banues në Lezhë, është konfliktuar fizikisht me tre shtetas të tjerë, të cilët e kanë dhunuar dhe më pas e kanë marrë me forcë me automjet. Menjëherë pas marrjes së njoftimit, shërbimet e Policisë së Lezhës kanë ngritur pika kontrolli në përimetrin rrethues dhe në akset lidhëse, me qëllim kapjen e autorëve, të cilët janë identifikuar, konkretisht shtetasit me iniciale K. P., B. V. dhe Xh. E., të tre banues në fshatin Tresh. Gjithashtu, u ngritën pika kontrolli në akset rrugore drejt Tiranës, Shkodër dhe Kukësit. Dy orë më pas, të gjendur nën presionin e kontrolleve intensive të Policisë, autorët e kanë zbritur nga automjeti 35-vjeçarin Dod Gjoka, i cili ka marrë ndihmë mjeksore në spitalin e Lezhës dhe ndodhet jashtë rrezikut për jetën. Grupi hetimor, në drejtimin e Prokurorisë, po punon për sqarimin e rrethanave dhe dokumentimin ligjor të rastit. Ndërkohë, vijojnë kontrollet intensive për kapjen e autorëve.