Kryetarja e Partisë Alternativa, njëherësh deputete e dale nga listat e Lëvizjes Vetëvendosje, ka komentuar situatën politike në të cilën ndodhet vendi, në pritje të përfundimit të ultimatumit të Gjykatës Kushtetuese për konstituimin e Parlamentit. Në një prononcim për Kosova Press, Kusari-Lila thekson se është e Lëvizjes Vetëvendosje të caktojë kreun e Kuvendit dhe nuk mund t’I merret kjo e drejtë nga Kushtetuesja. SINK “Nuk e besoj se mund të jetë një gjykim i tillë, për arsye se do të binte në kundërshtim me një aktgjykim paraprak të vetë Gjykatës Kushtetuese. Do të thotë, Gjykata Kushtetuese me një aktgjykim ia ka garantuar të drejtën propozuesit për të marrë, gjegjësisht për të propozuar dhe për të zgjedhur kryetarin e Kuvendit sipas propozimit të partisë së parë apo partisë fituese dhe ky është rasti. Përderisa, arsyeja që nuk po mbyllet seanca konstituive nuk ka të bëjë me mungesë të emrit të propozuar, por ka të bëjë me mungesë të kuorumit apo mospjesëmarrjes në votim. Prandaj, këtu është një kundërthënie e madhe në raport me mënyrën ose formën se si mund gjykata ta interpretojë ose ta marrë të drejtën e partisë së parë për të propozuar kandidatin për kryetar Kuvendi.” Kusari-Lila thotë se është e paqartë se çfarë mund të ndodhë në aspektin e pasojave juridike që do e ndjekin moskonstituimin e Kuvendit. Sipas saj nëse sdo arrihet një marrëveshje politike, mundësi mbetet edhe decertifikimi apo humbja e mandatit të deputetëve aktualë.