Kosova përkujton dyvjetorin e sulmit terrorist të 24 shtatorit 2023, ku mbeti i vrarë efektivi i policisë, Afrim Bunjaku dhe u plagosu një tjetër. Sulmi nisi në orët e hershme të mëngjesit të 24 shtatori, kur grupi terrorist sulmoi një postbllok të policisë së Kosovës dhe pasi u gjet përballë forcave speciale të Kosovës u tërhoq në Manastirin e Banjskës për strehim. Pas disa orësh luftime, pjesa më e madhe e grupit terrorist u tërhoq në drejtim të kufirit me Serbinë, ndërsa tre prej tyre u vranë nga forcat speciale të Kosovës dhe gjashtë të tjerë u arrestuan. Policia e Kosovës zbuloi gjithashtu edhe një sasi të madhe armatimi të rëndë, eksploziv, uniforma, logjistikë, ushqime, pajisje për barrikada. Autoritetet thanë se materialet e sekuestruara tregonin për një sulm të mirëorganizuar me objektiv marrjen e kontrollit de fakto të veriut të Kosovës. Hetimet e mëvonshme zbuluan se organizatori i sulmit ishte Milan Radoiçiç, një emër i njohur i serbëve në veri të Kosovës, me lidhje me Listën Serbe dhe i përfolur si i përfshirë në kontrabandë dhe trafik droge. Radoiçiç arriti që të tërhiqej drejt Serbisë, nga ku mori mbrojtjen e autoriteteve të Beogradit. Sot e kësaj dite, Kosova e kërkon për ta vendosur përballë përgjegjësisë për sulmin terrorist, por Serbia ka refuzuar ta dorëzojë. Në lidhje me ngjarjen reagoi edhe komuniteti ndërkombëtar, që ka bërë thirrje që autorët e sulmit të vihen para drejtësisë.