Varianti kolumbian i koronavirusit i njohur ndryshe si varianti “Mu” dyshohet se mund të jetë duke u përhapur edhe në Kosovë. Sipas mediave në Prishtinë, prej një javë Instituti Kombëtar i Shëndetit Publik të Kosovës ka dërguar 282 mostra në një laborator në Gjermani për detektim e mutacionit “Mu”. Pritet që përgjigje e analizave të mostrave të mbërrijë gjatë javës së ardhshme. Mutacioni “Mu”, i cili është regjistruar tanimë në Greqi dhe Itali, është më ngjitës dhe sipas ekspertëve të Organizatës Botërorë të Shëndetësisë, në disa raste ka provuar se është rezistent edhe ndaj vaksinave. Kosova po përballet prej javësh me një rritje të shpejtë të rasteve me Covid-19 dhe regjistron për momentin rreth 20 mijë raste aktive. Gjatë 24 orëve të fundit në Kosovë janë konfirmuar 583 raste të reja dhe kanë humbur jetën 14 persona. Sipas Organizatës Botërore të Shëndetit, deri më tani janë identifikuar katër mutacione të koronavirusit që janë shqetësuese: Mutacioni “Alpha”, i zbuluar për herë të parë në Kent, Britani të Madhe, mutacioni “Beta”, i cili është regjistruar në total në 141 vende, mutacioni “Gama” në 91 vende dhe mutacioni “Delta” në 170 vende,përfshirë edhe Kosovën dhe Shqipërinë.