Kosova eksportoi mallra me vlerë gati 40 milionë euro në Shtetet e Bashkuara të Amerikës në periudhën janar-dhjetor të vitit të kaluar. Shifra është 3 herë më e vogël se rekordi i eksporteve, prej 130 milionë eurosh, që bizneset kosovare kanë dërguar matanë Atlantiku në vitin 2021. Tashmë, këto eksporte mund të ulen edhe më tej pas vendosjes së tarifës prej 10 për qind nga ana e Shteteve të Bashkuara të Amerikës. Por cilët janë bizneset më të kërcënuara nga kjo tarifë. Të dhënat e Agjencisë së Kosovës për Statistika tregojnë se grupin kryesor të eksporteve e përbëjnë mobiljet, dyshekët dhe veshmbathjet. Sipas të dhënave të analizuara nga Radio Evropa e Lirë, vetëm në tremujorin e parë të këtij viti, Kosova eksportoi në SHBA veshmbathje, kryesisht fustane, në vlerë prej 3.2 milionë eurosh, ndërsa 1.8 milionë të tjera janë mobilie dhe materiale ndërtimi.