Një aksident i lehtë rrugor, për pak përfundoi në një krim mizor në Tiranë. Dy automjete, një tip Mercedes Benz dhe një Audi me targa angleze u gërvishtën gjatë qarkullimit në autostradën Tiranë-Elbasan, në afërsi të Saukut. Automjetet drejtoheshin nga dy vajza. Burimet pohojnë se pas incidentit, mes tyre ka nisur një debat se kush e kishte fajin dhe më pas kanë marrë në telefon dy të njohur të tyre. Njëra ka marrë në telefon shtetasin me inicialet M.B., ndërsa tjetra shtetasin Fatjon Dauti. Me të mbërritur në vendngjarje dy të rinjtë, debati i nisur mes dy vajzave përfundoi në përleshje fizike mes të rinjve. Nga përplasja ka mbetur i plagosur me sende të forta shtetasi Fatjon Dauti, që është shoqëruar menjëherë në spital për ndihmë mjekësore. Policia gjeti në vendngjarje edhe një armë zjarri pistoletë, ndërsa po heton mbi pronësinë e kësaj arme.