Kreu i SPAK, Altin Dumani ngriti edhe para Komisionit të Monitorimit të Asamblesë Parlamentare të Këshillit të Europës dy shqetësimet e hershme të Prokurorisë së Posaçme. Shqetësimi i parë lidhej me statusin, sipas tij, të paqartë të prokurorëve të posaçëm pasi mbyllin mandatin 9 vjeçar në SPAK. Mungesa e përcaktimit të qartë ligjor lidhur me statusin e prokurorit të posaçëm pas përfundimit të mandatit të tyre. Të rishikohet dhënia e mundësisë së prokurorit të posaçëm që të rikandidojë për të vazhduar të jenë pjesë e SPAK. Shqetësimi i dytë lidhet me mbingarkesën për akuzat e korrupsionit. Ligji parashikon aktualisht se kur dëmi i shkaktuar nga korrupsioni është mbi 50 mijë lekë, çështja i kalon SPAK për hetim. Dumani kërkoi rritjen e këtij pragu. Duhet të bëhen ndryshime në Kodin Penal lidhur me pragun monetar prej 500 Euro me qëllim rritjen e këtij pragu. Çdo akt korruptiv mbi këtë marzh bën kompetentë SPAK-un. Është koha që ky marzh të rritet dhe SPAK të fokusohet tek çështjet e ndjeshme dhe që janë më të vështira për t’u hetuar. Kreu i SPAK renditi si sfidë edhe ushtrimin e rolit të komisionerit publik, që nga janari i kalon prokurorisë së posaçme pasi organeve të përkohshme të vettingut u përfundon mandati. Ai bëri thirrje gjithashtu për angazhim të të gjithë shoqërisë në luftën kundër korrupsionit, pasi vetëm SPAK, siç tha, nuk mund të ketë suksesin e dëshiruar.