Gjendja e 15-vjeçarit që mbeti i plagosur me thikë pas një zënke me një bashkëmoshtar në një gjimnaz të qytetit të Durrësit është stabilizuar. Kështu njofton Spitali Rajonal i Durrësit, që thotë se i mituri u paraqit në urgjendje në gjendje tejet kritike për jetën, me plagë të shumta të shkaktuara nga goditjet me thikë, që i kishin shkaktuar dy çarje nga 2 centimetër në zemër dhe një çarje tjetër 3 centimetër në stomak. Spitali njofton se 15-vjeçari u fut menjëherë në spital dhe ekipi kirurgjikal realizoi një ndërhyrje të vështirë, ku u menaxhuan dëmtimet jetike dhe u rikthye stabiliteti hemodinamik. Siç njofton spitali, aktualisht i mituri po trajtohet në reanimacion në gjendje të stabilizuar. Ngjarja ndodhi paraditen e së mërkurë në gjimnazin Dom Nikoll Kaçorri në qytetin e Durrësit. Autori i plagosjes, një 14 vjeçar është shoqëruar nga policia, ndërsa dyshohet se sherri mes dy të rinjve ka nisur pas sharjeve në rrjetet sociale.