Pas shpalljes non grata të gazetarit Artan Hoxha, që pasoi rastin e Marin Memës, deputeti i Partisë Socialiste, Ardit Bido i dërgoi një letër zyrtare ministrisë së punëve të jashtme të Greqisë, ku kërkon publikimin e listës së personave shqiptarë që janë ndaluar të hyjnë në territorin grek, shoqëruar edhe me arsyet ligjore që kanë sjellë këtë vendimmarrje të Athinës zyrtare. “Prej vitesh në opinionin publik shqiptar përflitet se ekziston një listë shtetasish shqiptarë ndaj të cilëve autoritetet greke kanë vendosur masën të ndalimit të hyrjes në territorin grek. Mungesa e informacionit zyrtar ka krijuar pasiguri dhe shqetësim, sidomos te qytetarët që udhëtojnë rregullisht për punë, vizita familjare apo arsye të tjera të ligjshme.” – shkruhet në letrën që socialisti ka drejtuar ministrisë së jashtme greke.