Laert Haxhiu, që SPAK e akuzon si organizatorin dhe drejtuesin e një grupi të strukturuar kriminal prej nëntë anëtarë, e nisi kryerjen e akteve kriminale në shenjë hakmarrjeje për vrasjen e 2005 të djalit të xhaxhait Klodian Haxhiu dhe e vijoi pas arrestimit të dy miqve të tij të ngushtë, Anterio Kaloshi dhe Orgest Bilbili. I drejtuar dhe organizuar prej tij, SPAK thotë se grupi kriminal ndërmori akte konkrete kriminale për vrasjen e personave që konsideroheshin si anëtarë të grupit kriminal kundërshtar, i cili në atë kohë drejtohej nga Aldo Bare. Aktet kriminale të këtij grupi të strukturuar, nuk synuan vetëm jetën dhe shëndetin e kundërshtarëve, thotë SPAK, por dhe shkatërrimin e pronës, përmes përdorimit të lëndëve shpërthyese, apo kryerjen e akteve të vjedhjes me përdorimin e armëve. Sipas SPAK, me përjashtim të vrasjes së Çajup Selimit dhe Albi Bashaliut, të gjitha vrasjet, grabitjet dhe sulmet me tritol të kryera nga ky grup me urdhër të Laert Haxhiut janë kryer në shenjë hakmarrjeje ndaj personave që i konsideronte si pjesë apo mbështetës të Aldo Bares.