Intensifikimi i hetimeve për zbardhjen e vrasjes së tmerrshme të Fridman Xhaferraj, i cili u gjet i mbytur në rezervuarin e Gjançit, në Korçë, kanë rezultuar të sukseshme. Pas kryerjes së veprimeve hetimore, policia ka ngritur dyshimet për dy autorë të mundshëm të vrasjes së 25 vjeçarit. Dyshohet se krimi është kryer në bashkëpunim nga Lulzim Spahija dhe një 26 vjeçar me inicialet K.B , të dy banues në Lushnjë, të shpallur tashmë në kërkim. Trupi i pajetë i Fridman Xhaferraj u gjet i mbytur në rezervuarin e Gjançit në Korçë, me duart e lidhura dhe me shenja dhune në trup dhe në pjesën e pasme të kokës. Skema e krimit është ende e pazbardhur plotësisht nga ekspertët e kriminalistikës. Nuk dihet ende nëse trupi i Xhaferrajt është dhunuar dhe vrarë në një tjetër vend dhe më pas për të humbur gjurmët autorët e krimit e kanë zhvendosur dhe mbytur në rezervuarin e Gjançit, apo gjithë krimi është kryer në fshatin e Korçës.