Reshjet e shiut zbutën intensitetin e rënies së tyre në qytetin e Durrësit gjatë natës mes të martës dhe të mërkurës, por niveli i ujit mbeti pothuajse i pandryshuar në zonat më të prekura të qytetit nga vërshimet e një dite më parë. Situata në zonën e ish-Kënetës në Durrës vijon të jetë kritike. Uji ka përmbytur gjithçka dhe nuk është tërhequr as nga rrugët dytësore dhe as nga banesat e shumë familjeve. Të dhënat paraprake tregojnë se janë mbi 100 banesa nën ujë dhe një numër i lartë biznesesh, që kanë pësuar dëme të konsiderueshme materiale, që nga dëmtimi i pajisjeve elektroshtëpiake, orendive, mobilejeve dhe materialeve të tjera. Uji vazhdon të jetë një rrezik jo vetëm për banesat, por edhe pēr shëndetin e banorëve, sidomos për fëmijët dhe të moshuarit. Problematike mbetet situata dhe në Spitallë dhe NISH Tulla. Ndërkaq, nē pjesën tjetër të qytetit, situata paraqitet më e qetë. Uji është tërhequr nga të gjitha rrugët kryesore të Durrësit, si edhe nga aksi kombëtar Durrës- Tiranë, duke rikthyer normalitetin në qarkullim në këtë aks.