Në një bashkëbisedim me gazetarët, kreu i SPAK, Altin Dumani u dha përgjigje pyetjeve në lidhje me dosjet e bujshme që po hetojnë prokurorët e SPAK. Ai nuk dha përgjigje të thelluara për çështje që janë nën hetim, si dosja e shpërdorimit të fondeve të BE-së, ku me masën e sigurisë arrest me burg është edhe ish-ministri i Shëndetësisë, Ilir Beqaj, për dosjet e Metës dhe Kryemadhit, Arben Ahmetjan apo për dosjen e inceneratorëve. Dumani tha se këto çështje janë nën hetim dhe nuk mund të komentojë më tepër për të ruajtur sekretin hetimor. Megjithatë, sipas tij, prokurorët e posaçëm po shqyrtojnë, verifikojnë dhe hetojnë çdo fakt e të dhënë të paraqitur në dosjet në fjalë. Kreu i SPAK kërkoi mirëkuptimin e gazetarëve dhe qytetarëve për vonesat në hetimet e disa pjesëve, duke shtuar se bëhet fjalë për dosje voluminoze. Dumani tha se janë shtatë persona të akuzuar për krime të rëndë për të cilët ka kërkuar ekstradimin nga Dubai. Megjithatë, kreu i SPAK tha se detyra e institucionit që drejton në këto raste përmbyllet me kryerjen e procedurave për riatdhesimin e tyre. Pjesa tjetër u takon autoriteteve të tjera, ndërsa theksoi se problematikën e mosekstradimeve nga Dubai nuk e ka vetëm Shqipëria, por edhe për vende të Bashkimit Europian. Kreu i SPAK foli edhe për 21 Janarin dhe Gërdecin. Për të parën u shpreh se prokuroria e posaçme është e detyruar që të regjistrojë procedim penal nisur nga natyra e dosjes, ndërsa për Gërdecin tha se çështja është në gjykim.