Sulmet zakonisht kryhen natën. Dronët ukrainas lëvizin me shpejtësi në ujë. Kur ekuipazhi i anijeve ruse i sheh ata, është tepër vonë. Marinarët rusë hapin zjarr por anija e tyre goditet dhe më pas shkatërrohet. Kështu ndodhi edhe me anijen ruse të patrullimit Sergey Kotov, një javë më parë. Dronët e detit ukrainas kanë revolucionarizuar luftën në det gjatë viteve të fundit. Grupi-13, një njësi e fshehtë e agjencisë së inteligjencës ushtarake të Ukrainës, qëndron pas sulmit mbi luftanijen Sergey Kotov dhe BBC ka mundur të sigurojë akses në një prej operacioneve të tij. Që kur u krijua vitin e kaluar, njësia thotë se ka fundosur pesë anije ruse dhe ka dëmtuar disa të tjera. Por komandanti i saj, i cili prezantohet me emrin e tij të luftës, Trembëdhjetë, thotë se Sergej Kotov ishte objektivi më i vështirë deri më tani. Grupi-13 kishte sulmuar dhe dëmtuar anijen dy herë në të kaluarën, por arriti ta fundoste atë vetëm në përpjekjen e tretë.