Një numër i madh dronësh misterioz janë raportuar të jenë parë ndërsa fluturojnë mbi pjesë të Nju Xhersit dhe Bregut Lindor në javët e fundit, duke ndezur spekulime dhe shqetësime se kush i ka dërguar dhe pse. Guvernatori i Nju Xhersit, Phil Murphy i shkroi një letër Presidentit Joe Biden duke i kërkuar përgjigje. Senatori i ri i Neë Jersey-t, Andy Kim, e kaloi natën e së enjtes në kërkim të dronëve në veri të Nju Xhersit. Murphy dhe zyrtarët e zbatimit të ligjit kanë theksuar se dronët nuk duket të jenë një kërcënim për sigurinë publike, por shumë ligjvënës shtetërorë dhe komunalë megjithatë kanë kërkuar rregulla më të rrepta se kush mund të ngrejë në qiell mjetet fluturuese pa pilot. FBI është një nga disa agjencitë që po hetojnë rastin dhe u ka kërkuar banorëve të ndajnë video, foto dhe informacione të tjera që mund të kenë në lidhje me dronët. Dhjetra dëshmitarë në Nju Xhersi kanë raportuar se kanë parë dronë në qiell duke filluar nga nëntori. Në fillim ata u panë duke fluturuar përgjatë lumit Raritan, i cili ushqen rezervuarin Round Valley, rezervuarin ujor më të madh të shtetit, rreth 80 kilometra në perëndim të qytetit të Nju Jorkut. Por shpejt pamjet e dronëve u raportuan në mbarë vendin, përfshirë edhe strukturat ushtarake, kërkimor dhe prodhuese, e mbi të gjitha mbi fushën e golfit të Presidentit të zgjedhur Donald Trump në Bedminster. Kohët e fundit dronët janë parë edhe në zonat bregdetare.