Dronët ajrorë ukrainas goditën një platformë ruse nafte në Detin Kaspik për herë të parë të enjten, duke ndaluar prodhimin në objektin në pronësi të Lukoil, sipas një zyrtari nga Shërbimi i Sigurisë së Ukrainës. Sulmi ndaj platformës Filanovsky, pjesë e fushës më të madhe të naftës në Kaspik të Rusisë, është shenja e fundit se Ukraina po përpiqet të përshpejtojë fushatën e saj për të ndërprerë prodhimin rus të naftës dhe gazit. Të paktën katër sulme me dronë goditën platformën, duke detyruar ndalimin e punës në më shumë se 20 puse nafte dhe gazi, tha zyrtari. Fusha Filanovsky, e zbuluar në vitin 2005, u përurua nga Presidenti Vladimir Putin në vitin 2016 dhe prodhon rreth 120,000 fuçi naftë në ditë. Nuk ishte e qartë se nga e nisi ushtria ukrainase sulmin, por Deti Kaspik është më shumë se 700 km larg nga kufiri më i afërt i Ukrainës. Kievi ka kryer sulme të shumta me dronë ndaj objekteve ruse të naftës këtë vit në një përpjekje për të minuar aftësinë e Moskës për të financuar luftën e saj në Ukrainë. Sulmet kanë synuar veçanërisht rafineritë e naftës, shumë prej të cilave ndodhen në pjesën evropiane të Rusisë. Ukraina e zgjeroi fushatën e saj muajin e kaluar duke synuar cisterna të flotës hije të rusisë që transportojnë naftë ruse përmes Detit të Zi. Tre anije të tilla janë goditur nga dronë detarë ukrainasë në dy javët e fundit. Të paktën shtatë shpërthime kanë goditur cisterna të tjera që kanë ndaluar në portet ruse që nga dhjetori 2024 në vende të tjera duke përfshirë Mesdheun. Ukraina nuk ka konfirmuar dhe as mohuar ndonjë rol në këto sulme.