Dritan Dajti, i dënuar për vrasjen e 4 efektivëve të policisë më 7 gusht të vitit 2009, ka lënë për disa momente qelinë e burgut të Peqinit për të marrë pjesë në ceremoninë mortore të nënës së tij në Tufinë. Ai është shoqëruar nën masa të rrepta sigurie nga Forca Speciale të Burgjeve dhe forcat Speciale e forcat RENEA, për në funeral, për t’i dhënë lamtumirën e fundit nënës. Pas kësaj, Dajti është kthyer sërish në ambjentet e burgut të sigurisë së lartë, aty ku vuan dënimin e tij. Dritan Dajti u dënua me burgim të përjetshëm nga Gjykata e Shkallës së Parë me akuzën e vrasjes së katër oficerëve të policisë, gjatë një operacioni policor për kapjen e tij në vitin 2009. Vitin e shkuar Apeli pranoi gjykimin e shkurtuar, duke i ulur dënimin me 25 vjet heqje lirie. Ndërkohë më 11 qershor të këtij viti Gjykata e Lartë vendosir të dënojë me burgim të përjetshëm Dritan Dajtin për vrasjen e katër efektivëve të policisë. Trupa gjykuese e përbërë nga Ilir Panda, Sandër Simoni dhe Artur Kalaja vendosën të pranojnë rekursin e Prokurorisë për Krime të Rënda që kundërshtoi vendimin e Apelit, e cila e dënoi Dajtin me 25 vite burg.