Në Bruksel vazhdon sot dialogu Kosovë-Serbi me përfaqësuesit e qeverisë së Kosovës dhe Serbisë që do të diskutojnë mbi tema të hapura në takimin e nivelit të lartë, të mbajtur javën e shkuar ndërmjet kryeministrit të Kosovës, Avdullah Hoti dhe presidentit serb, Aleksandar Vuçic. Ekspertët e të dyja vendeve, sipas Prishtinës zyrtare, do ta përgatisin draftin e marrëveshjes finale Kosovë-Serbi. Ajo I kundërshton pohimet se takimi I sotëm ka karakter teknik. Hoti, tha në mbledhjen e qeverisë, deklaroi se “objektivat janë të qarta për ta përmbyllur këtë proces dhe jo që ai të vazhdojë si dialog teknik”. Koordinator nga Kosova në dialog është emëruar Skender Hyseni, i cili në Bruksel udhëton së bashku me Ibrahim Makollin. Sipas kryeministrit, ata “do ta bëjnë draftimin e marrëveshjes finale, sa i përket çështjes së të pagjeturve”. Autoritetet e Prishtinës si dhe organizatat joqeveritare vendore e ndërkombëtare pohojnë se gjatë luftës së Kosovës (1998-1999) janë vrarë dhe zhdukur më shumë se 13.500 persona. Këto shifra të publikuara nga Fondi për të Drejtën Humanitare në Kosovë dhe Beograd, janë shfrytëzuar edhe nga institucionet e Kosovës.Sipas këtyre burimeve, rreth 76% e këtyre personave kanë qenë civilë të vrarë.