Seanca paraprake e dosjes “Sterilizimi” u shty më datë 3 qershor në orën 09.00, pasi ish ministri i Shëndetësisë, Ilir Beqaj si dhe mbrojtja e tij kërkuan kohë të njiheshin me aktet. Pas përfundimit të seancës paraprake e cila zgjati 1 orë e 30 minuta, ish ministri i Shëndetësisë u shpreh se nuk i janë vënë në dispozicion të gjitha aktet. Sipas tij, përveç materialeve të shkruara të skanuara, ka dhe CD apo DVD të cilat nuk mund të skanohen. Kjo është hera e dytë që shtyhet seanca paraprake e çështjes “Sterilizimi”, ku janë marrë të pandehur 9 persona, mes tyre edhe Ilir Beqaj nën akuzën e “Shpërdorimit të detyrës” kryer në bashkëpunim. Për këtë çështje, janë lënë në masën “arrest në burg” dy persona, konkretisht ish zëvëndës ministri i shëndetësisë Klodjan Rrjepaj dhe biznesmeni Ilir Rrapaj.