Gjykata e Dibrës shpalli moskompetencën dhe kaloi në SPAK dosjen për vrasjen e 23-vjeçarit Renis Dobra. Të dielën është marrë në pyetje nga prokuroria e posaçme, Petrit Çakri, një nga personat e arrestuar për vrasjen dhe mbytjen e Dobrës. Në vijim pritet të pyeten edhe personat e tjerë të arrestuar Kristi, Fatjon dhe Aleksandër Bushgjokaj. 23 vjeçari u mbyt me litar mbrëmjen e 8 korrikut të këtij viti dhe trupi i pajetë u gjet buzë lumit të Shkopetit. Dyshohet se krimi ka ndodhur në kuadër të një grupi të strukturuar kriminal dhe shkak është bërë prishja e pazareve të drogës. Të tre vëllezërit Bushgjoka, personazhe të njohur për policinë, dyshohet se në bashkëpunim me njëri-tjetrin kanë organizuar rrëmbimin dhe vrasjen e 23-vjeçarit Dobra, të cilin pasi e mbytën me litar e hodhën bashkë me makinën e tij buzë liqenit të Shkopetit. Njëri nga vëllezërit Bushgjoka u arrestua në zonën e Astirit, ndërsa Petrit Çakrri u kap në Kukës. Për të kryer vrasjen, vëllezërit Bushgjokaj dhe Çakrri kishin marrë disa makina me qira, në Rinas dhe Yzberisht. Makinat janë përdorur për ndjekjen e 23 vjeçarit për tre ditë me radhë.